Бирге туруп бука менен арстан,
Бир нерсени талкуу кылып атышкан.
Бир убакта телефон чалып арстанга:
Бат кел, күтөм, - деп аялы айтканда,
Баратам,-деп, даярданды кайтканга.

Бука ага боорун тырмап каткырды:
"Бас да жаагын, угасыңбы катынды?
Башка чыгат аялга ийсең башыңды."
Бир өзгөчө сыймык менен тик карап,
Букага арстан мындай деген кеп салат:

"Билип жүргүн, бука антип өкүрбөй,
Башкаларды көрө бербе өзүңдөй.
Баалабаган кереги жок буюмдай,
Баш кошконуң сенин үйдө уюң да.
Басса-турса жандап, жүрөк сүйүнгөн,
Барктуу арстан аялым бар үйүмдө."

Бул тамсилдин бизге берчү сабагы:
Баалап, барктап, жубайыңды карагын.
Бука болсоң арстанга өзүң теңебе,
Бардык жерде бар букадай немелер...
Бирок да бар чыныгы шер арстандар,
Буканы укпай, өз жубайын кастарлайт.