Кыялданам

Кыялданам. Кыялымда баш кошобуз,
Кубанычка бөлөп назик көңүлдү.
Бойдоктук кез. Биз ал менен коштошобуз,
Бирге жашап өткөрсөк деп өмүрдү.

Баары келет – жакын достор, туугандар,
Бизге айтат каалоолорун жүрөктөн.
Бактылуубуз – көктө каалгып тургандай,
Ак сүйүүбүз оргуштайт көкүрөктөн.

Кереги жок. Сөз айтуунун кереги жок,
Каректерге тигилишет каректер.
Бул мүнөттөр – бактылуулук ченеми жок.
Бул мүнөттөр – биздин кымбат белектер..